كل واحد يسجل يومياته

السلام عليكم ورحمة الله وبركاته

موضوع أعجبني فاحببت ان اطرحه عليكم

كل واحد يسجل لنه يومياته ، شسوي من أول ما يقوم الصبح لي الليل ؟؟

راح أكتب لكم يومياتي لما اشوف في تفاعل في الموضوع

لكم مني أرق التحيات
كاتمة الحزن

يخ فلللله
اليوم قعدت الصبح الساعة 5 وصليت ورتبت سريري وبعدين دخلت الحمام اسبح
وسويت ليي فطور لان محد قعد انزين وسرحت شعري ورحت المدرسة
وبعدين قعدت اتمشى ويا صديقتي اريج الكون (اروجة )وسولفنا الى ما طق الجرس وما سووا طابور
وبعدين حصة الانج عادية ما راجعت اينا شيء لان اليوم علينا امتحان منتصف انج وانزين وبعدين الحصة ال2 وال3 الامتحان عقب ما كملت قعدت اعدل في طالوتي لان صايرة كلش بيضة ما فيها شيء
كتبت حروف صديقاتي
وكتبت جنتولة بخط احليو الى الحين ما عدلتها كامل
وبعدين طق الجرس مال الفسحة رحت مريت على صديقاتي عشان نجمع وبعدين قعدنا ناكل وانسولف عن الامتحان وكل وحدة ويش سوت انزين بعدين طق الجرس بس خسارة ما شريت ليي جالكسي لان المقصف من يطن الجرس يسكرون
انزين وبعدين رياضيات اتملللت لان الدرس تافه وبعدين حصة العربي زعلت معلمتنا لان البنات يسووون فوضى وبعدين قلنا اليها الي يسووون فوضى اتباعدهم ووافقو الحمد لله وبعدين شرحت وما كملت قالت الينا باجر بتكمل انزين احنا استانسنا لان المعلمة طلعت من الصف مو زعلانة وبعدين الاخيرة رياضة لعبنا كرة سلة انزين اني فريق الوردي لان بس 5 دقايق ما سجلت ولا هدف حتى الفريق الابيض لان كلنا مبدعين ههههه انزين وبعدين طن الجرس بدلنا ورحنا الباص انزين وبعدين كنت اني دايخة من الرياضة وبعدين وصلت البيت وبعدين سويت اشغالي ووصليت واتغذيت وطالعت الفجر المستحيل كانت احليوة طالعوها الساعة 2:00 في البحرين احليوة اليوم الحلقة 21 انزين وبعدين رحت ارتب غرفة اختي لان حالتها حالة وبعدين سويت جاي ايلينا والى الى اخويي وبعدين قعدت على النت وانزين رحت سيدة على منتديات اسير الوجدان ههههههههههههه وسعت قصيدة نورك علي مالت السيد محمد الحسيني اسمعوها احليوة ههههه
وبعده ما يكمل اليوم

ننتظر يومياتكم

السلام عليكم ورحمة الله وبركاته

شكرا جزيلا لك اخيتي لتفاعلك في الموضوع
أسعدني وجودك في صفحتي المتواضعة

وفقك المولى عز وجل

لكِ مني أرق التحيات
كاتمة الحزن

السلام عليكم ورحمة الله وبركاته

سوف اكتب يوميتي لهذا اليوم الموافق ( يوم الخميس )

بدأ يومي من الساعة 5 الصبح ، صليت ، وبعدين رحت اسبح ، بعدين قعدت أقرا قرآن ، صارت الساعة 6 ، رحت أقعد اخواني علشان يجهزون الي المدرسه ،وبعدين رحت فتحت كتاب الاسر لانه كان امتحان اليوم (( اليوم آخر امتحان افتكينا) استرجع معلوماتي شوي ، بعدين الوالد رجع من الدوام قال ليي بتروحين المدرسه قلت ليه اي ، الساعه سبع الا ربع اني في المدرسه ، طبعاً المسافه طوييله على ما اوصل الصف وكان يطق المطر ، امشي على راحه ، لين وصلت الصف ، دخلت الا البنات قاعدين يراجعون ، وحده من البنات ما كانت مراجعة عدل لانها ما حضرت في الحصص ، قعدت اشرح ليها شوي ، بعدين جت لين الحجية ..... جايبه صبغ اظافر (حنة الاظافر)،وكحل ، ما اشتريت لانه ما عجبوني ، بعدين طق جرس ، صار حصة الامتحان ، قدمت الامتحان ، وقدنا نحن على المعلمة علشان تلم الاوراق لانه باقي نص ساعة على ما يطق جرس نهاية الحصه واحنه مكملين في الاساس ، بالعزر لمتهم ،بعدين قعدنا نسولف مع البنات ، لما طق جرس الحصة الاولى كان علينه اثرائية ( علي كرة يد) كنت تعبانه راسي يعورني وما لي خلق العب وكان الجو كللش ما يشجع ، بس المعلمة قالت لازم نلعب واختارتني علشان العب بس ما رضيت هع ، بعدين طق جرس الحصه الثانيه بعد كان علينه كرة يد ، وبعد كانوا يلعبون مباراة ، طق جرس الحصه الثالثه ، معلمة العرب كانت تصحح الاوراق فما درسنا ، قدنا جذي ، بعدين طق جرس الفسحه ، طلعنا فسحه قعدت مع صديقتي نسولف لما طق جرس الحصه الرابعه ، دخلنا الصف ، علينا انج معلمة الانج ما درستنا كانت تلعبنا ،ومر الوقت واحنه نلعب ، طق الجرس ، صارت الحصه الخامسه ، علينا بدن ، رحنه الصاله والبنات على ما يجون من الصف وعلى ما يبدلون لازم يتأخرون طافت ربع الحصة وهم للحين مادخلو الصاله ، المعلمة درستنا، كملنا من حصة البدن ، طق الجرس علينا الحصة السادسه مال ، والمعلمة على ما تسكت البنات وعلى مانجي من الرياضه طارت 10 دقائق ، المعلمة عصبت بس بعدين سكتت وقامت تشرح الدرس ، طق جرس الحصة السابعة علينا دين ، أحلى حصة ، البنات لازم يطفشون المعلمة ويسألونها اساله تعجيزيه ،كانت الحصه كلها ضحك ، بعدين طق جرس نهاية الدوام . اتمللت صراحه لانه ما ابي ارد البيت المدرسه احلى وخصوصا يوم الخميس ،دائما يكون يوم حافل بالمفاجآت والوناسه.

طلعت برع المدرسه الوالد كان ينطرني ، وصلت البيت الساعة 2 ، السؤال المعتاد شنو الغذى؟؟ كان صالونة سمچ ،بدلت ثيابي وصليت وقعدت اتغدى ، واني اطالع مسلسل عذاري ،على الغذى، ابوي اليوم بنطلع موو ،قال اي (( وناااسه ارتحت نفسياً لانه اسبوعين وره بعض كله امتحانات النفسية تتعب )) ، رحت ارقد شوي بس ما رقدت ، قمت لانه الوالدة قالت قومي لبسي لانه بنطلع ، لبست وطلعنا رحنا بيت بابا عود علشان نمر على خالاتي وناخذهم معانه ونروح السوق ،وصلنا بيت بابا عود وأخذنا خالاتي ورحنه السوق وقعدنا ندور ، دخلنا محل الذهب علشان نشتري ذهب وعلى ما يختارون شي يشترونه قعدنا ننطر لين ما عجبهم شي وبعدين طلعنه من المحل قعدنا ندور ونتمشى . بعدين رجعنا بيت بابا عود علشان نرجع خالاتي . وعلشان نرد البيت ، وصلنا البيت الساعة 8 ، قعدت شوي اطالع تلفزيون بعدين جيت على الكمبيوتر علشان اشوف شنو آخر التطوارت في منتدى اسير الوجدان بس كالعادة لا يوجد تفاعل .

وهذا كان يومي

السلااام عليكم

لك خالص الشكر اخيتي ع هذا المووووضوع الرااائع

اليووم رااح اقووول لكم يووووميااتييي
مالت امس لان تووه الصبح و ما صااار شييي

امسس يا حبااايبيي
قعدت الساعة خمس و نص و صليت بعدين تسبححت و لبست ثيااابي عقب تريقت طبعاا كالعادة ريووقي جبس و عصيرر و بعدين لبست جوتيي و مشيت اني و تااايقر لين وصلنا للباااص و من الصبح و يا البنات ضحك و طناز ..
بعدين و صلنا للمدرسة كان طبعا علينا اختباار انج و كنت خااايفة من السننق .. انزززين الحصة الاولى كان علينا اثراائي اسر نص الصف و النص الثااني بدن اني كان عليي اسرر كنت ابي اعيد اختبار البدن مال الجري 200 متر فستأذنت من المدرسة مالت الاسر و رحت الصاالة لمعلمة البدن فقلنا ليها نبي نركض بس الصالة كان فيها اغراااض و عفاايس فقالت لينا براا يطيح مطر اخااف تطيحوون قلنا ليها ما علي اهمم شي نجيب علامة كاملة و ركضت لكن تحت المضلااات و حصلت علامة كاملة .....
بعد هالحصة امتحــــان الانج كانت دقات قلبي تتسااارع لكن هدأت لما شاافت الاختبااار كان جدا سهل و انشاااء الله اجيب علاامة كاملة
اماا باقي الحصص فكانت مملة كالعادة
اممم و اخذت ورقة الفيزيااااء جبت 18 من عشرررين و الله قهر الغلط من آلتي خرفت ليي نص الامتحان....

و نهاية المدرسة كنت واااجد مستاانسة لان يووم الخميسسس
و هوو عيد الطلااب
و رحت الباااص وو وصلني البيت و تغديت صالونة لحم معني ما احبهاا
و بعدين جيت للكمبيووتر كان النت مخترب قعدت اخربط فيه و عدلته و قعددددت و استاانست
لكن رااح اتركم لفتررة عقب الامتحانات
و تحياتي

» واحد شاف زوجته كاشخه شوفوا ايش سوى !!!!!!
» طالبةً في فصل دراسي واحد بـ «الوسطى»
» بصراحه انا احب واحد من المنتدى والحب مو حرام
» كل واحد يعد من 1 إلى 6 و يقول صديقه المفضل في المنتدى. ‏
» اكثر من 17 نفر في بيت واحد هههه دخلو وشوووفوو